Noong nakaraang buwan, inaprubahan ng Lubhang Kagalang-galang na Antonio Carlos Rossi Keller, Obispo ng Frederico Westphalen (Brazil), ang isang panalangin para sa pam-pribadong pagdedebosyon sa yumaong Papa Benedicto XVI. Ang orihinal na wika nito ay nasa wikang Portuges at isinalin ng mga sikat na pook-sapot sa wikang Ingles.
Dahil sa pagnanasang mas maging madali itong maunawaan ng ating mga kababayan, bagama’t mga mananalita na rin naman ng Ingles, ninais ko ring magkaroon ng salin nito sa Filipino; ang proyektong ito ay aking sinumulan katuwang ang Comision sa Pagsasalin ng Hermandad de la Sagrada Eucaristia nitong mga nakaraang linggo. May apat na saling ginawa ang Comision: isa, sa wikang Latin, at tatlo sa wikang Tagalog (isa’y literal na salin, at ang isa pa’y sa diwa ng pagsasalin ni Mons. Andrade na kilala sa kanyang magnum opus na “Aklat ng Pagmimisa sa Roma”, at ang panghuli ay ang aking personal na pagsasalin).
Sa kadahilanang hindi pa pinagkakaisahan ng Hermandad de la Sagrada Eucaristia ang paglilimbag sa opisyal na salin sa wikang Filipino, aking pinauunang ilathala ang personal kong salin ng panalangin para sa pansariling debosyon Papa Benedicto XVI.
Muli, ipinaaalala sa Sambayanan ng Diyos na ang panalanging ito’y para lamang sa pam-personal na panalangin (ad usum privatum). ‘Di ito maaaring dasalin sa loob ng banal na Liturhiya, o ‘di kaya’y sa mga pampublikong pagtitipon ng mga mananampalataya tulad ng nobena, etc. Madarasal lamang ito sa kapasidad ng isang mananampalataya bilang pribadong entidad. Ito’y bilang pagtalima sa kautusan ni Papa Urbano VIII na sinumang ‘di pa ibinibilang ng Santa Iglesia sa katalogo ng mga Banal ay ‘di pa maaaring bigyang parangal ng buong ‘Sangka-Kristiyanuhan. Isa pa, kahit sa ating pagdarasal sa pampribadong panalanging ito, makabubuti pa ring ipagdasal ang kaluluwa ng ating yumaong Papa Benedicto XVI.
‘Di natin dapat pangunahan ang Inang Simbahan sa pagdedeklara na ang isang tao ay Banal na kapiling ng Diyos. Sa kabila nito, walang pumipigil sa atin sa personal o pansariling debosyon o paghingi ng pananalangin sa Papa Benedicto.
Narito ang Panalanging aking salin:
PANALANGIN
ad usum privatum o para sa pansariling debosyon
Makapangyarihan at walang hanggang Diyos,
pinapagningas mo sa puso ng Iyong lingkod
na si Papa Benedicto XVI
ang pagnanasang Ika’y masumpungan at maipahayag;
niloob mo ring siya’y mag-handog ng sarili upang maging
kamanggagawa ng katotohanan
sa serbisyo ni Kristo at ng Santa Iglesia:
kaya naman, isinasamo namin sa Iyo,
matutuhan nawa naming ibigin ang Simbahang itinatag ni Kristo,
at palagiang tumalima sa ipinahahayag niyang ‘di nagmamaliw na mga katotohanan.
Pagindapatin mo po, O Panginoon,
na luwalhatiin ang Iyong lingkod na si Papa Benedicto,
at sa kanyang pananalangin ay igawad sa amin ang biyayang aming hinihiling
(banggitin ang intensyon). Sa pamamagitan ni Kristong aming Panginoon. Amen.
cum permissu superiorum
✠ Antonius Carolus Rossi Keller, D.D.
Episcopus Vestphaleniana
Kaalinsabay nito, nagdisenyo rin ako ng ilang estampita na maaaring iimprenta nang may sukat na 4.25″ x 2.5″.
Upang tingnan at i-download ang HD copy ng disenyo ay maaaring pinduutin ang button na ito:
Maaaring mag-imprenta ng estampitang lalagyan ng memento ni Papa Benedicto o kahit yaong wala. Tingnan lamang ang disenyo. Narito ang ilang sample:
Designs, with relic:
Back designs, without relic.
Sa ngayon, mayroon pa rin akong ilang mga estampita ni Papa Benito XVI sa wikang Ingles na mayroong memento niya. Tingnan lamang ang post kong ito kung nagnanais humingi:
Sa susunod na mga panahon, ang ipamamahagi ko naman ay ang estampitang sarili kong disenyo, sa wikang Filipino. Abangan!
TIBI SE COR MEUM TOTUM SUBJICIT 